Zelenskiy AQSHdan kreditga qurol olmoqchi
U, shuningdek, Fransiyaning harbiy yordamini qo‘llab-quvvatladi.
Vladimir Zelenskiy Ukraina telekanaliga bergan intervyusida AQSH harbiy yordamini “o‘ta muhim” deb atadi va Oliy Radani imkon qadar tezroq safarbarlik to‘g‘risidagi qonunni qabul qilishga chaqirdi.
Zelenskiyning so‘zlariga ko‘ra, agar Qo‘shma Shtatlar Kiyevga kreditga harbiy yordam taklif qilsa, prezident buni darhol qabul qiladi.
“Bu yerda tanlov yo‘q, qanchalik tezroq bo‘lsa, shuncha yaxshi”, degan u.
Ukraina prezidenti, shuningdek, KIevda Ukrainani to‘liq himoya qilish uchun 25 ta Patriot havo mudofaa tizimi yetishmasligini aytdi. Aynan Patriot so‘nggi haftalarda Rossiyaning ommaviy hujumlari oldida Ukrainaning energiya tizimini himoya qilishga yordam beradi.
Bundan tashqari, Zelenskiy Emmanuel Makronning Fransiya armiyasini Ukrainaga jalb qilish tashabbusini qo‘llab-quvvatladi. Uning so‘zlariga ko‘ra, xorijlik harbiy xizmatchilar ikki yo‘nalishda foydali bo‘lishi mumkin: Ukraina armiyasini tayyorlash va shikastlangan G‘arb harbiy texnikasini taʼmirlash.
