Kadastr agentligining 127 nafar xodimi pora bilan qo‘lga olingan
Ularning 33 nafari qayta ushbu jinoyatga qo‘l urgan.
Korrupsiyaga qarshi kurashish agentligining o‘rganishlari natijasiga ko‘ra, Kadastr agentligidagi korrupsiyaviy jinoyatlarning aksariyati xizmat mavqeidan foydalanib firibgarlik qilish, mansab soxtakorligi va hokimiyat yoki mansab vakolatini suiisteʼmol qilish yo‘nalishlarida sodir etilmoqda.
Kadastr agentligida firibgarlik yo‘li bilan pora berishga dalolat qilish va pora berish jinoyatini sodir etgan 127 nafar shaxsning 33 nafari muqaddam shu kabi jinoyatlarni sodir etgani uchun sudlangan.
“Davlat kadastrlari palatasining tuman (shahar) bo‘limlarida ko‘chmas mulkka bo‘lgan huquqlarni davlat ro‘yxatidan o‘tkazishda korrupsiyaviy jinoyatlar 29 foizni tashkil qiladi”, — deyiladi Antikorrupsiya agentligining hisobotida.
Maʼlumotlarga ko‘ra, o‘rganish natijalari bo‘yicha Iqtisodiyot va moliya vazirligiga taqdimnoma yuborilgani aytilmoqda.
