"U meni murabbiy sifatida keyingi bosqichga olib chiqdi"
Gvardiola Kloppning ketishi haqidagi savoldan so'ng yig'lab yubordi
"Manchester Siti" bosh murabbiyi Pep Gvardiola Angliya premyer-ligasining 38-turi doirasidagi "Vest Hem Yunayted"ga (3:1) qarshi o'yindan keyin o'tkazilgan matbuot anjumanida nemis mutaxassisi Yurgen Kloppning "Liverpul"ni tark etishi haqidagi savoldan so'ng yig'lab yubordi.
"Men uni juda sog'inaman... Yurgen Klopp hayotimning haqiqatan ham muhim qismi edi. U meni murabbiy sifatida keyingi bosqichga olib chiqdi. Biz bir-birimizni hurmat qilamiz. Uning qaytib kelishini his qilyapman. Men hozirgi g'alabalarga yolg'iz erisha olmasdim”, - dedi Gvardiola.
Eslatib o‘tamiz, avvalroq Arne Slot Yurgen Klopp o‘rnini egallashi ma’lum bo‘lgandi. U “Liverpul” bilan 2027-yilgacha mo‘ljallangan shartnoma imzolagan. Xabar qilinishicha, ingliz klubi "Feyenoord"ga shartnoma muddatidan oldin bekor qilingani uchun tovon puli sifatida 13–15 million yevro to‘laydi.
Gvardiola boshchiligidagi “Manchester Siti” esa mavsum yakuniga ko‘ra APLda 38 o‘yin o‘tkazib, 91 ochko jamg‘ardi. Jamoa ketma-ket to'rtinchi marta Angliya Premyer-ligasi chempionligini qo'lga kiritib, mamlakat tarixida rekord o'rnatdi.
