Toshkentdagi supermarketdan suvarak chiqdi

Ijtimoiy tarmoqda Toshkent shahrining Mirobod tumanidagi supermarketda pishgan go‘sht rastasida suvarak yurgani aks etgan video tarqaldi. Holat yuzasidan Sanepidqo‘mita Toshkent shahar boshqarmasi rasmiy munosabat bildirdi. 

 

Maʼlum qilinishicha, holatga oydinlik kiritish maqsadida Boshqarmaning Mirobod tuman bo‘limi xodimlari tomonidan joyiga chiqib o‘rganish ishlari o‘tkazilgan. O‘rganishlar davomida supermarketda zararsizlantirish ishlarini o‘tkazib turish uchun MCHJ bilan shartnoma tuzilgani va so‘nggi marta joriy yilning 30 iyun kuni dezinseksiya ishlari olib borilgani aniqlangan. 

 

Shuningdek, do‘konning pastki qavatida Xitoy restorani joylashgan bo‘lib, unda oziq-ovqat mahsulotlari tayyorlanishi va undan do‘konga suvaraklar kelib qolish ehtimoli mavjudligi aytilgan. Shu sababli bir necha marotaba birgalikda zararsizlantirish ishlarini o‘tkazish bo‘yicha murojaat qilinganda restoran tomonidan doimiy rad javobi berib kelingan.

 

“Restoran rahbariyati bilan olib borilgan suhbatda ovqatlanish korxonasida zararsizlantirish ishlarini olib borish uchun hech qanday shartnoma mavjud emasligi maʼlum bo‘ldi. Shuningdek, bugun supermarketda profilaktik chora ko‘rish maqsadida qaytadan zararkunandalarga qarshi dezinseksiya ishlari amalga oshiriladi.

 

Aytish joizki, ushbu supermarket hamda Xitoy restoranida Tadbirkorlik subyektlarining huquqlari va qonuniy manfaatlarini himoya qilish bo‘yicha vakildan ruxsat olinib, kuchaytirilgan tekshiruv ishlari amalga oshirilishini maʼlum qilamiz”, deyiladi rasmiy munosabatda.