Andijonda soydan yosh qizchaning jasadi topildi
U qo‘shni respublikadan oqib kelgani aytildi.
Andijon viloyati Jalaquduq va Xo‘jaobod tumanlari bo‘ylab oqqan seldan so‘ng bir qizning tanasi jonsiz holda topilgan. Bu haqida Andijon viloyati hokimligi axborot xizmati xabar bermoqda.
Qizning yoshi 5-6 larda ekani taxmin qilingan.
Avvaliga viloyat hokimligi Jalaquduq va Xo‘jaobod tumanlari hududidagi tezkor o‘rganishlar davomida ushbu hududlarda bu yoshdagi farzandini yo‘qotgan oila aniqlanmaganini maʼlum qildi.
"Bundan kelib chiqib, ushbu shaxs viloyatimizdan tashqari bo‘lgan, toshqin ro‘y bergan boshqa hududdan oqib kelgani taxmin qilinmoqda. Vaziyat bo‘yicha qo‘shimcha axborotlar maʼlum qilinadi", — deyiladi xabarda.
Hokimlik matbuot xizmatining keyingi xabarida soydan topilgan jasad qo‘shni Qirg‘izistondan oqib kelgani aytiladi.
"Xo‘jaobod tumanidagi Shahrixonsoydan topilgan taxminan 5-6 yoshli qizaloq O‘sh shahridagi oiladan ekani tasdiqlanmoqda. Yuborilgan fotosurat orqali O‘shdagi oila vakili bu qizaloq uning o‘z oilasidan ekanini tasdiqlagan.
Hozirda oila vakili Xo‘jaobod tumani sari yo‘lga chiqqanini bildirgan. Viloyat hokimligi va tegishli organlar tomonidan mazkur oilani qo‘llab-quvvatlash harakatlari tashkil etildi", — deyiladi xabarda.
Maʼlumot uchun, 14 iyul kuni Qirg‘izistonning O‘sh viloyatida tog‘ va adirliklarida kuzatilgan jala yomg‘irlar yog‘ishi oqibatida Andijon viloyatida kuchli sel oqdi.
Oqbo‘ra soyida oqqan kuchli sel oqibatida Xo‘jaobod tumani Yorqishloq qishlog‘ida bitta ko‘prikni suv oqizib ketgan. Yana bitta piyodalar ko‘prigi qulab vayron bo‘lgan.
Bu vaqtda Qirg‘izistondagi ijtimoiy tarmoqlarda O‘shdagi qishloqlardan birida yashovchi 1980 yilda tug‘ilgan ayol 2005, 2014 va 2018 yilda tug‘ilgan qizaloqlari bilan oqib ketgani haqida xabar tarqalgan.
