Qashqadaryolik ayol eriga ukol qilib o‘ldirib qo‘ydi
U eriga nomaʼlum dori yuborgani aytilmoqda.
Qashqadaryo viloyatining G‘uzor tumanida ayol eriga “seftraksion” ukol qilib, o‘ldirib qo‘ydi.
Maʼlum bo‘lishicha, tibbiy maʼlumotga ega bo‘lmagan ayol 13 yildan beri oila aʼzolariga shifokor bilan maslahatlashmasdan ukol qilib kelgan.
Voqea sodir bo‘lgan kuni ayol eri shamollagani uchun unga dorixonadan “seftraksion” olib kelib, hech qanday sinovsiz dorini yuborgan. Shundan so‘ng, dori unga reaksiya bergan va ayol eriga “Deksametazon” dorisini yuborgan. Oqibatda erkak vafot etgan.
Erkakning ota-onasi sudda o‘g‘li “seftraksion”dan vafot etmagani, kelini unga boshqa nomaʼlum dori yuborganini aytgan. Ekspertiza xulosasi va dorixona sotuvchisining ko‘rsatmasiga ko‘ra, bu vajlar rad etilgan.
Ayol Jinoyat kodeksi 102-moddasining 1-qismida ko‘rsatilgan jinoyatni sodir etganlikda aybli deb topilgan. Unga nisbatan 3 yil muddatga ozodlikni cheklash jazosi tayinlangan.
