O‘zbekistonning yangi milliy turizm brendi yaratiladi
Bu bo‘yicha Prezident farmoni qabul qilindi.
"O‘zbekiston Respublikasida turizm infratuzilmasini yaxshilash va xorijiy turistlar oqimini yana-da oshirishga qaratilgan qo‘shimcha chora-tadbirlar to‘g‘risida"gi Prezident farmoniga muvofiq, Turizm qo‘mitasi:
-
2024 yil 1 oktyabrgacha yangi milliy turizm brendini yaratish uchun tanlov o‘tkazadi;
-
2024 yil Xalqaro turizm kuni doirasida birinchi global sayyohlik mediakampusini tashkil qiladi;
-
2024–2025 yillarda auditoriyasi 10 milliondan ortiq bo‘lgan 50 nafargacha xorijiy jurnalist, bloger, vloger va inflyuenserlarni jalb qiladi.
2025 yil 1 yanvardan kamida 100 nafar xorijiy ishtirokchisi bo‘lgan 3 kundan kam bo‘lmagan biznes tadbirlarni O‘zbekiston hududida tashkil qilgan tadbirkorlar 2028 yil 1 yanvargacha ushbu biznes tadbirlarni tashkil qilishdan olingan daromaddan olingan foyda solig‘ini ushbu soliq bo‘yicha belgilangan soliq stavkasiga nisbatan 50 foizga kamaytirilgan soliq stavkasi bo‘yicha to‘laydi.
Shuningdek, O‘zbekistonning turizm mahsulotini xalqaro va ichki turizm bozorlarida targ‘ib qilish, sayohat va dam olish uchun xavfsiz mamlakat sifatidagi imijini yana-da mustahkamlashga qaratilgan yangi milliy turizm brendi (tanitish belgisi) yaratiladi.
