Avtobusdagi reklama yo‘lovchilarga xalaqit bermasligi kerak — Toshshahartransxizmat
Yo‘lovchilarning e’tirozlaridan so‘ng avtobuslardagi reklama ovozini me’yorlashtirish bo‘yicha choralar belgilandi.
Toshkent shahridagi avtobuslarda namoyish etiladigan reklama roliklarining ovoz balandligi pasaytirilishi tavsiya qilindi. Bu haqda “Toshshahartransxizmat” AJ axborot xizmati ma’lum qildi.
Kompaniya ma’lumotiga ko‘ra, avtobus salonlaridagi monitorlarda reklama namoyish etish uchun ajratilgan joylar “E-auksion” elektron savdo platformasida o‘tkazilgan auksion g‘olibiga ijara asosida berilgan.
So‘nggi vaqtlarda ijtimoiy tarmoqlarda avtobuslardagi reklama roliklari ovozining balandligi yuzasidan yo‘lovchilar e’tiroz va takliflarini bildirgan. Murojaatlarni inobatga olgan holda, “Toshshahartransxizmat” vakillari reklama joylarini ijaraga olgan tadbirkorlik subyekti bilan uchrashuv o‘tkazgan.
Unda reklama ovozining yo‘lovchilarga ta’siri va jamoat transportida qulay muhitni ta’minlash masalalari muhokama qilingan. Reklama ovozini me’yorida saqlash, yo‘lovchilarning o‘zaro muloqoti va haydovchining xizmat faoliyatiga xalaqit bermaydigan sharoit yaratish muhimligi ta’kidlangan.
Uchrashuv yakunida tadbirkorlik subyekti vakillariga reklama roliklari ovozini pasaytirish, yo‘lovchilarga ortiqcha shovqin va noqulaylik tug‘dirmaslik yuzasidan tavsiya va ko‘rsatmalar berilgan.
“Toshshahartransxizmat” AJ mazkur masala nazoratga olinganini bildirib, reklama namoyishi jarayonida yo‘lovchilar manfaatlarini ta’minlash va jamoat transportida qulay muhitni saqlashga e’tibor qaratilayotganini ma’lum qildi.
