Farg‘onada 28 nafar bog‘cha tarbiyalanuvchisi kasalxonaga yotqizildi: oziq-ovqat namunalari tekshirilmoqda
Tibbiy yordam so‘rab murojaat qilgan yana 23 nafariga uyda davolanishga ruxsat berilgan.
Farg‘ona shahridagi 2-, 7- va 47-sonli maktabgacha ta’lim tashkilotlari tarbiyalanuvchilari turli alomatlar bilan viloyat yuqumli kasalliklar shifoxonasiga murojaat qilgan. 2026-yil 26-oktabr soat 11:00 holatiga ko‘ra, 28 nafar bola shifoxonada davolanmoqda. Bu haqda Oziq-ovqat mahsulotlari xavfsizligi qo‘mitasi ma’lum qildi.
Bolalar tana haroratining ko‘tarilishi, qorin sohasidagi og‘riq, holsizlik, ko‘ngil aynishi va ich ketishidan shikoyat qilgan.
Dastlabki epidemiologik surishtiruv doirasida bolalar iste’mol qilgan oziq-ovqat mahsulotlari va taomlar o‘rganilmoqda. Shuningdek, mahsulot yetkazib beruvchilar ham aniqlangan.
Oziq-ovqat mahsulotlari va tayyor taomlardan laboratoriya tekshiruvlari uchun namunalar olingan. Hozirda epidemiologik surishtiruv va laboratoriya tekshiruvlari davom etmoqda.
Qo‘mita ma’lumotiga ko‘ra, shifoxonada davolanayotgan bolalarning umumiy ahvoli barqaror, og‘ir ahvoldagi bemorlar yo‘q. Tibbiy yordam so‘rab murojaat qilgan yana 23 nafar bolaning ahvoli qoniqarli deb baholanib, ularga tegishli tavsiyalar berilgan va uy sharoitida davolanishga ruxsat etilgan.
Bolalarning kasallanishiga nima sabab bo‘lgani laboratoriya tekshiruvlari va epidemiologik surishtiruv yakunlari asosida aniqlanadi.
