Toshkentda havo sifati “nosog‘lom” darajada: bunga nima sabab bo‘ldi?
Havo sifati maxsus komissiya tomonidan doimiy kuzatib borilmoqda.
25-oktabrdan 26-oktabrga o‘tar kechasi Toshkent shahrida noqulay meteorologik sharoitlar sabab havo sifati yomonlashdi. PM2.5 va PM10 zarrachalari miqdori ortib, ayrim kuzatuv punktlarida havo ifloslanishi xalqaro havo sifati indeksi bo‘yicha “nosog‘lom” va “juda nosog‘lom” darajalarga yetdi.
Ekologiya qo'mitasi ma’lumotiga ko‘ra, tunda haroratning keskin pasayishi, shamolning kuchsizligi va kuchli harorat inversiyasi atmosferaning quyi qatlamlarida havo almashinuvini cheklagan. Natijada mayda chang zarrachalari yer yuzasiga yaqin qatlamda to‘planib, ifloslanish tun davomida va ertalab ham yuqori darajada saqlangan.
Meteosat sun’iy yo‘ldoshi tasvirlarida 26-oktabr soat 00:00 dan 08:00 gacha Toshkent va unga tutash hududlarda havoda chang kuzatilgani qayd etilgan.
Shuningdek, tun davomida maxsus mobil laboratoriya yordamida atmosfera havosi instrumental o‘lchovlardan o‘tkazilgan. Kuzatuv punktlarining aksariyatida PM2.5 mayda dispers zarrachalari bilan ifloslanish xalqaro AQI bo‘yicha “nosog‘lom” va “juda nosog‘lom” toifalarga mos kelgani aniqlangan.
Milliy havo sifati indeksi bo‘yicha esa Toshkentda PM2.5 ko‘rsatkichi “sariq”, PM10 ko‘rsatkichi “to‘q sariq” darajada bo‘lgan.
Ma’lumotga ko‘ra, bugun kun davomida ham havo sifati xalqaro AQI bo‘yicha “nosog‘lom”, milliy indeks bo‘yicha esa “sariq” darajada saqlanishi kutilmoqda.
