Pepe 41 yoshda futboldagi faoliyatini yakunladi
Bu haqida u o‘zining ijtimoiy tarmoqlardagi sahifasida maʼlum qildi.
Portugaliya milliy jamoasi himoyachisi Pepe futbolchilik faoliyatini yakunlaganini eʼlon qildi.
Pepening so‘nggi jamoasi "Portu" klubi bo‘lgandi. U bu jamoaga 2019 yilda qaytgan va yozda amaldagi kelishuvi nihoyasiga yetgandi. Markaziy himoyachi "Maritimu", “Real” va "Beshiktosh" klublari sharafini ham himoya qilgan.
Pepe "Portu" safida 4 karra Portugaliya chempioni, “Real” bilan 3 karra Ispaniya chempioni, 3 marta YCHL g‘olibi va 2 martadan Ispaniya kubogi va Superkubogi sohibiga aylangan.
Shuningdek, Pepening hisobida Portugaliya safida o‘tkazilgan 141 o‘yin ham bor. U milliy jamoasi bilan 2016 yilgi Yevropa chempionati g‘olibiga aylangandi.
