Qashqadaryodagi shifoxonada liftdan ayol jasadi topildi
U muassasada “sanitarka” lavozimida ishlab kelgan.
Respublika tez-tibbiy yordam ilmiy markazining Qarshi shahar filialiga qarashli shifoxonada tibbiyot xodimi lift shaxtasidan o‘lik holda topildi.
Maʼlumotlarga ko‘ra, shifoxonada “sanitarka” bo‘lib ishlovchi ayol ish faoliyati davomida shifoxona binosidagi liftdan foydalanishga uringan. Ammo lift nosozligi bois uning shaxtasiga tushib ketgan.
Masʼullarning maʼlumot berishicha, bu lift mutaxassis ishtirokida faqatgina og‘ir bemorlarga xizmat ko‘rsatgan.
Ayol ishda ko‘rinmay qolgani bois hamkasblari uning shu shifoxonada ishlaydigan singlisiga xabar bergan. Natija bo‘lmagach, huquqni muhofaza qiluvchi organlarga xabar berilgan. 20 soatdan ortiq qidiruvlardan so‘ng, 2024 yilning 4 avgust kuni 36 yoshli ayol lift shaxtasidan o‘lik holda topilgan. Voqeadan so‘ng ushbu liftdan foydalanish cheklab qo‘yilgan.
Qo‘shnilariga ko‘ra, marhumaning 3 nafar farzandi bo‘lgan. Turmush o‘rtog‘i Rossiyada ishlaydi. Ayni paytda Qarshi shahar IIBB xodimlari tomonidan tergovga qadar surishtiruv harakatlari olib borilmoqda.
