“Xalqimizning chinakam qahramonlari bo‘ldingiz”
Prezident Olimpiada chempionlari bilan telefon orqali suhbatlashdi.
Prezident Shavkat Mirziyoyev Parijdagi yozgi Olimpiya o‘yinlarida O‘zbekiston sport delegatsiyasiga navbatdagi 2 ta oltin medalni keltirgan va ularning soni bo‘yicha rekord ko‘rsatkichga erishilishiga hissa qo‘shgan sportchilar - bokschilar Asadxo‘ja Mo‘ydinxo‘jayev va Lazizbek Mullajonov bilan telefon orqali suhbatlashdi.
“Boks bo‘yicha O‘zbekiston dunyoda tengsiz ekanini yana bir karra isbotlaganingiz uchun minnatdorlik bildirib, tabriklamoqchiman. Xalqimizning chinakam qahramonlari bo‘ldingiz. Yangi O‘zbekistonning yangi yoshlariga juda katta o‘rnak, namuna bo‘layapsizlar. Yurtimiz o‘g‘lonlari nimalarga qodir ekanliklarini butun dunyo hamjamiyati ko‘rib turdi va men sizlardan g‘ururlanaman”, - dedi davlatimiz rahbari.
Yigitlarning kechagi g‘alabalari xalqimizga juda katta mamnuniyat bag‘ishlagani taʼkidlandi. Prezident yuqori natijalarga erishayotgan olimpiyachilarimizga, butun terma jamoamizga o‘zining qizg‘in salomini yetkazishni so‘radi.
Chempionlar ham Prezident va xalqimiz ishonchini oqlaganidan mamnunligini bildirib, shunday g‘alabalarga erishish imkonini bergan eʼtibor va keng sharoitlar uchun davlatimiz rahbariga tashakkur izhor qildilar. Bundan buyon ham Vatan bayrog‘ini baland ko‘tarishda davom etishga vaʼda berdilar.
