"Atletiko Madrid" "Real" va "Barsa"ga jiddiy javob qaytarmoqchi

 

Yozning eng qimmat transferi amalga oshdi. Madridning “Atletiko” klubi “Manchester Siti”dan hujumchi Julian Alvares transferini e’lon qildi. Insayderlarning fikricha, transfer summasi 75 million yevro + bonuslar sifatida 20 million yevroni tashkil qilgan. Bu tarixiy transfer: “Manchester Siti” o‘z tarixida hech qachon bunday summaga futbolchi sotmagan edi. Biz Alvaresning Madridga sayohati xronologiyasi haqida ma'lumot taqdim etamiz.

 

O‘tgan mavsumda Julian “Manchester Siti” safida barcha turnirlarda 54 ta o‘yin o‘tkazib, 19 ta gol urdi va 13 ta golli uzatmani amalga oshirdi. Bu yaxshi natija, lekin argentinalikning imkoniyatlari bundan ham yuqoriroq edi. Shunday bo'lsa-da, "Siti"da u Erling Holanddan keyingi o'rinbosar sifatida qabul qilinmadi. 24 yoshida Jahon kubogi, Amerika kubogi, Chempionlar ligasi, Libertadores kubogi va ikki marta Premyer-liga chempionligini qo'lga kiritgan futbolchi yana ko'p maqsadlarni oldiga qo'ygan. Bu haqda iyul oyida Alvaresning o'zi ma'lum qilgandi.

 

"O'tgan mavsumda men "Siti" safida eng ko'p o'ynagan futbolchilardan biri edim. Lekin, yakunda muhim o'yinlarda chetda qolishni yoqtirmayman, jamoani g'alabasiga o'z hissamni qo'shishni xohlayman. Men o'zim uchun nimani xohlayotganim haqida o'ylab ko'rishim kerak".

 

Xabarlarda aytilishicha, 24 yoshli hujumchi "Siti" rahbariyatidan uni qo'yib yuborishni so'ragan. 2023/2024-yilgi mavsum oxirida Alvares klub bilan shartnomasini uzaytirishdan bosh tortgandi. "Manchester Siti" bosh murabbiyi Pep Gvardiola futbolchining so'zlariga javob qaytarib, uning jamoadan ketishi mumkinligi haqidagi ma'lumotlarga izoh berdi.

 

"Alvares bu haqda o'ylab ko'rishini aytdi. U o‘ylanib bo‘lgach, agenti “Manchester Siti” sport direktoriga qo‘ng‘iroq qiladi va natijada biz nima bo‘lishini ko‘ramiz. Bilaman, u muhim bahslarda o'ynashni xohlaydi, lekin boshqalarda ham vaziyat shunday. Muhim uchrashuvlarda maydonga tushishni istaydigan 18 yoki 19 nafar futbolchim bor. Agar u ko'proq narsani xohlasa, bu yaxshi."

 

"Marca" nashrining xabar berishicha, "Atletiko" Alvaresni Antuan Grizmanning o'rinbosari deb hisoblamoqda. Madridliklar argentinalikni ko'p gol ura oladigan va maydonda yetakchi bo'lishga qodir futbolchi sifatida ko'rmoqda. "Atletiko" shuningdek, Kilian Mbappening "Real Madrid"ga o'tishi va "Barselona"ning Niko Uilyams va Dani Olmo bilan tuzgan katta shartnomalariga shu orqali javob bermoqchi.