200 dan ortiq jarimasi bor Lacetti auksionda sotib yuborildi
Qarzdorlik miqdori 88 mln so‘mni tashkil etgan.
Toshkentda 230 ta qoidabuzarlik sodir etgan ayolning Lacetti avtomobili auksionda sotib yuborildi.
Maʼlum bo‘lishicha, fevral oyida mashina 174 ta qoidabuzarlik uchun xatlangan va 59 mln so‘m qarzdorlikni to‘lash sharti bilan qaytarilishi aytilgan.
Ammo 6 oy o‘tib, qoidabuzarliklar soni 230 tagacha ko‘payib, jarimalar miqdori 88 mln so‘mga oshgan. Bunga sabab haydovchi xatlanishidan oldin ham yo‘llarda qoidalarni buzib yurgan.
Qarzdorning Lacetti‘si auksionga chiqarilib, 92 mln so‘mga sotilgan. Kelib tushgan mablag‘ qarzdorning jarimalarini so‘ndirishga yo‘naltirilmoqda.
