“Chegara bilmas shifokorlar” tashkiloti Rossiyadagi faoliyatini to‘xtatdi
Bu haqida xalqaro tashkilot saytida maʼlum qilindi.
“Chegara bilmas shifokorlar” xalqaro notijorat tashkiloti 32 yillik faoliyatidan so‘ng Rossiya Federatsiyasini tark etishini maʼlum qildi. Tashkilot buning sababini Adliya vazirligining tashkilotning mamlakatdagi filialini xorijiy nodavlat tashkilotlar reyestridan chiqarib tashlash to‘g‘risidagi qarori bilan izohladi.
"Mamlakatdagi dasturlarimizni yakunlaganimizdan juda qayg‘udamiz, chunki tibbiy va gumanitar yordamga muhtoj bo‘lgan ko‘plab odamlar endi biz ko‘rsatishimiz mumkin bo‘lgan yordamsiz qoladi", — deyiladi tashkilot bayonotida.
Xabarda tashkilot "imkoniyat bo‘lsa, Rossiyadagi faoliyatini davom ettirishni istashi" qayd etilgan.
O‘tgan oy o‘rtalarida Rossiya Adliya vazirligi xalqaro gumanitar tashkilotlarning litsenziyalarini bekor qildi, bu ro‘yxatda xususan, “Chegara bilmas shifokorlar” va “Dunyo shifokorlari” tashkilotlari ham bor edi.
