Trampga Eronga qarshi harbiy harakatlar variantlari ko‘rsatildi — WSJ
AQSh harbiy rahbariyati Eronga qarshi harbiy harakatlar bo‘yicha bir nechta variantni taqdim etgan.
AQSh harbiy rahbariyatining Yaqin Sharq yo‘nalishi uchun mas’ul yuqori lavozimli vakili Donald Trampga Eronga qarshi harbiy harakatlar bo‘yicha bir nechta variantni taqdim etdi. Bu haqda The Wall Street Journal (WSJ) AQSh rasmiylari va uchrashuvdan xabardor manbalarga tayanib xabar berdi.
Nashr manbalariga ko‘ra, uchrashuv Oq uyda bo‘lib o‘tgan. Unda AQSh mudofaa vaziri Pit Xegset va Qurolli kuchlar shtab boshliqlari qo‘mitasi raisi, general Den Keyn ham qatnashgan.
WSJ qayd etishicha, muhokamada AQSh ma’muriyatining boshqa a’zolari ham ishtirok etgan. Suhbat mavzulari faqat Eron bilan bog‘liq masalalar bilan cheklanmagan.
Avvalroq, oktyabr oyida ayrim OAV AQSh va Isroil rasmiylari Eronga qarshi yangi zarbalar berish ehtimolini muhokama qilayotgani haqida xabar tarqatgan edi.
Associated Press xabariga ko‘ra, AQSh rasmiylari Yaqin Sharqdagi ittifoqchilarini Eron bilan harbiy mojaro qayta boshlanishi mumkinligidan ogohlantirgan.
Reuters esa AQShga Eron bilan avvalgi mojaro davomida yo‘q qilingan harbiy texnikani almashtirish uchun 6,1 milliard dollar kerak bo‘lishi mumkinligini yozgan.
