Xorazmda bolalarni qarg‘agan tarbiyachi ishdan bo‘shadi
U, shuningdek, guruh ota-onalaridan uzr so‘ragan.
Ijtimoiy tarmoqlarda Xorazm viloyati Qo‘shko‘pir tumanidagi bog‘chalarning birida tarbiyachilarning bolalarni qarg‘agani aks etgan videolavha tarqaldi. Holat yuzasidan viloyat Maktabgacha va maktab taʼlimi boshqarmasi munosabat bildirdi.
Qayd etilishicha, videolavhada aks etgan holat joriy yilning 18 sentyabr kuni Qo‘shko‘pir tumanidagi 39-son davlat maktabgacha taʼlim tashkilotida sodir bo‘lgan. O‘rganish davomida mazkur Davlat maktabgacha taʼlim tashkilotining 2-o‘rta guruh tarbiyachisi M.B. o‘zining mobil qurilmasida tarbiyalanuvchilar bilan shug‘ullanayotib, jarayonni videotasvirga olgani va bexosdan ota-onalar uchun ochilgan maxsus telegram-guruhiga jo‘natgani aniqlangan.
Ishchi guruh tomonidan tashkilot xodimlari o‘rtasida sodir bo‘lgan holat yuzasidan tushuntirish ishlari olib borilib, qayta shunday holatlar sodir bo‘lsa, qonuniy chora ko‘rilishi yuzasidan ogohlantirilgan.
Holatga sababchi bo‘lgan tarbiyachi M.B. esa qilgan ishidan pushaymon ekanini bildirib, mazkur guruh ota-onalaridan uzr so‘ragan va o‘z xohishiga ko‘ra ishdan bo‘shagan.
