Olmaliqda suvdan zaharlangan bolalarning 7 nafari shifoxonadan chiqdi
Hozirda maktab o‘quvchilarining sog‘lig‘i ijobiy ekani aytildi.
Avvalroq Toshkent viloyatining Olmaliq shahrida joylashgan ixtisoslashtirilgan Buxoro maktabida o‘quvchilar suvdan zaharlangani haqida xabar berilgandi. Holat yuzasidan Bolalar ombudsmani qo‘shimcha maʼlumot berdi.
Qayd etilishicha, o‘quvchilar maktab hududidagi filtrlanmagan suvdan isteʼmol qilishi oqibatida sog‘lig‘idan shikoyat qilib, joriy yilning 15-sentyabrdan 19-sentyabrga qadar 12 nafar o‘quvchi o‘tkir ichak kasalligiga gumon qilinib, yuqumli kasalliklar bo‘limiga murojaat qilgan. Hozirda maktab o‘quvchilarining sog‘lig‘i ijobiy bo‘lib, ularning 7 nafariga uyida davolanishga javob berilgan.
Sog‘liqni saqlash vazirligi Sanitariya-epidemiologik osoyishtalik va jamoat salomatligi xizmatining Toshkent viloyati boshqarmasi tomonidan tekshirish ishlari olib borilib, suvdan, oziq-ovqat mahsulotlari va boshqa vositalardan kimyoviy tahlil uchun namunalar olingan. Hozirda holat yuzasidan Olmaliq tuman prokuraturasi tomonidan tergovga qadar tekshiruv ishlari olib borilmoqda.
