Noqulay ob-havo va tirbandliklar: Poytaxt yo‘llarida xavfsizlik nazorati kuchaytirildi
Haydovchilardan ehtiyotkorlikni oshirish va yo‘l harakati qoidalariga rioya qilish so‘raldi.
Poytaxtda yomg‘irli ob-havo va yo‘llardagi noqulay sharoit sabab yo‘l harakati xavfsizligi nazorati kuchaytirildi.
Davlat yo‘l harakati xavfsizligi xizmati ma’lumotiga ko‘ra, yomg‘ir tufayli yo‘llarda ko‘rish masofasi pasayishi va harakatlanish murakkablashishi mumkin. Shu sababli poytaxt ko‘chalarida sun’iy tirbandliklar hamda yo‘l-transport hodisalarining oldini olish maqsadida YPX xodimlari kuchaytirilgan ish rejimida xizmat olib bormoqda.
Haydovchilardan yo‘l harakati qoidalariga qat’iy amal qilish, oldindagi transport vositasi bilan xavfsiz masofani saqlash hamda chorrahalarda yo‘l-patrul xizmati xodimlarining ishoralariga rioya qilish so‘ralgan.
