O‘zbekiston — Turkiya olimlari platformasi yaratiladi
Bu haqida Islom sivilizatsiyasi markazi maʼlum qildi.
O‘zbekistondagi Islom sivilizatsiyasi markazi delegatsiyasining Turkiyaga qilgan safari davomida Istanbul shahridagi Ayo Sofiya majmuasi, Ko‘k masjid, To‘pqopi saroyi, qadimgi Efes shahri va Galikarnas maqbarasi kabi mashhur tarixiy yodgorliklarning kichik modellarini o‘z ichiga olgan Ochiq osmon ostidagi miniatyuralar muzeyi – Miniatürk singari diqqatga sazovor joylarda qator uchrashuvlar o‘tkazildi. Markaz mutaxassislari ushbu tarixiy obidalar va muzeylar, kutubxona va boshqa maʼrifiy muassasalar tajribasini o‘rganishdi.
Jumladan, Turk va Yevropa meʼmorchiligining nodir namunasi “Yulduz” saroyida saqlanayotgan Qo‘qon xoni Amir Umarxon turk sultoni Mahmud II ga hadya qilgan Qurʼoni Karim nusxasi delegatsiya aʼzolarida katta taassurot qoldirdi.
