Rossiyaning qarshiliklariga qaramay BMTni isloh qilish rejasi qabul qilindi
Nyu-Yorkdagi sammitda Germaniya yetakchiligida ishlab chiqilgan “Kelajak shartnomasi” tasdiqlandi.
BMTni isloh qilish rejasini tasdiqlash marosimi avvalida Rossiya Tashqi ishlar vaziri o‘rinbosari Sergey Vershinin rejadan tashqari nutq so‘zladi va hujjat matniga qo‘shimcha o‘zgartirishlar kiritish zarurligini maʼlum qildi. Vershinin ovoz berishsiz amalga oshirilishi kerak bo‘lgan hujjatning barcha 193 mamlakat tomonidan rasman maʼqullanishini shubha ostiga qo‘ydi.
Shunday bo‘lsada, 143 mamlakat Rossiyaning bu so‘rovini ko‘rib chiqmaslik va uni rad etish uchun ovoz berdi. Xalqaro tashkilotni isloh qilish to‘g‘risidagi hujjatning qabul qilinishiga Rossiyadan tashqari Belarus, Nikaragua, Shimoliy Koreya va Suriya ham qarshi chiqdi.
Birlashgan Millatlar Tashkilotini islohoti rejasi, jumladan, BMT Xavfsizlik kengashini isloh qilish, yadro qurolidan xoli dunyoga erishish, barqaror rivojlanish, xalqaro xavfsizlik, fan, texnologiya va innovatsiyalar sohasidagi hamkorlikni mustahkamlash maqsadlarini o‘z ichiga oladi. Hujjat bandlarini muhokama qilish 2024 yil boshidan beri davom etmoqda.
