Borrel: Yevropa Ittifoqi Ukrainani mag‘lub etish evaziga urushni tugatishga qarshi
Bu haqida YEI diplomatiyasi rahbari BMT Xavfsizlik kengashi yig‘ilishida fikr bildirdi.
"Men barcha “tinchliksevarlarga” murojaat qilaman: bu urush qanday tugashi muhimligini unutmang", — dedi Borrel.
Uning so‘zlariga ko‘ra, agar ukrainaliklar o‘z davlatlarining yaxlitligini buzishga ko‘nsa, bu tajovuzkor uchun "yaxshi o‘rnak" bo‘ladi va u buni qayta-qayta takrorlashni xohlaydi".
Jozep Borrel Ukrainadagi vaziyat bo‘yicha BMTning aniq hisobotlari mazmunini eslatdi: "Uylar va infratuzilmalari ataylab vayron qilingan, tinch aholi yashash uchun zarur bo‘lgan xizmatlardan mahrum bo‘lgan, ayniqsa qish mavsumi boshlanganda mamlakatning uchdan ikki qismi uchun elektr energiyasi ishlab chiqarish quvvati yo‘q qilingan".
Yevropa Ittifoqi diplomatiyasi rahbari, shuningdek, Rossiya Federatsiyasiga KXDR va Erondan qurol-yarog‘, jumladan, ballistik raketalar yetkazib berilishini qoraladi.
"Ushbu qurollar Ukraina tinch fuqarolariga qarshi qo‘llanilishi, bundan keyin ham azob-uqubat va vayronagarchiliklarga sabab bo‘lishi mumkin. Shuningdek, bunday taʼminotlar Yevropa xavfsizligiga bevosita tahdiddir", — deya qo‘shimcha qildi Borrel.
