Avtomobillar hovlidan chiqadi, bolalar uchun joy ochiladi: Toshkentda yangi loyiha
Ko‘p qavatli uylarning ichki hovlilaridagi avtoturargohlarni tashqariga chiqarish rejalashtirilmoqda.
Toshkent shahar hokimligi “15 daqiqali qulay muhit” loyihasi doirasida poytaxt mahallalarida amalga oshirilishi rejalashtirilgan o‘zgarishlar haqida ma’lumot berdi.
Loyiha konsepsiyasiga ko‘ra, bog‘cha, maktab, oilaviy poliklinika, maishiy xizmat ko‘rsatish shoxobchalari va dam olish maskanlari piyoda 15 daqiqalik masofada joylashishi kerak. Bu orqali kundalik yumushlarga sarflanadigan vaqtni qisqartirib, oila, hordiq va muloqot uchun ko‘proq imkoniyat yaratish ko‘zda tutilgan.
Rejaga muvofiq, avtoturargohlar va avtomobil yo‘laklari ko‘p qavatli uylarning ichki hovlilaridan tashqariga chiqarilishi mumkin. Bo‘shagan hududlar bolalar o‘ynashi, sayr qilish va qo‘shnilarning dam olishi uchun moslashtiriladi.
Shuningdek, mahallalarda bolalar aravachasi bilan sayr qilish, soyada dam olish yoki qo‘shnilar bilan suhbatlashish mumkin bo‘lgan xiyobonlar va sersoya yo‘laklar barpo etish rejalashtirilgan. Bolalar va kattalar uchun sport maydonchalari hamda uchrashuv joylari ham tashkil etiladi.
Loyiha doirasida mahalla ko‘chalariga zamonaviy videokuzatuv tizimlari va favqulodda vaziyatlarda yordam chaqirish imkonini beruvchi ko‘zga tashlanadigan SOS tugmalarini o‘rnatish ham nazarda tutilgan.
Toshkent shahrida 2027-yilda 100 ta, 2030-yilga borib esa jami 400 ta mahallani kompleks yangilash rejalashtirilgan.
Hokimlik ma’lumotiga ko‘ra, loyihaning asosiy maqsadi mahallalarni yanada qulay va xavfsiz maskanga aylantirish, shu bilan birga, aholi o‘rtasidagi o‘zaro hurmat va yordamga tayyorlik kabi qadriyatlarni saqlab qolishdan iborat.
