Har bayramda shu bo‘lar takror: nomi bor-u o‘zi yo‘q chegirmali poyezd chiptalari
Bilet topishning imkonsizligi tashkiliy xatolar bilan bog‘liqmi?
4 yildan beri Toshkent — Xorazm yo‘nalishidagi poyezdda qatnayman. Olis hududlardan kelib men kabi poytaxtda tahsil olayotgan talabalar har bayramda “O‘zbekiston temiryo‘llari” tomonidan beriladigan imtiyoz — poyezd chiptalarining chegirmasini intiqlik bilan kutadi. Albatta, bu kabi imtiyozlar talabalar uchun har tomonlama qulay. Biroq shu 4 yil mobaynida “O‘zbekiston temiryo‘llari” AJ tomonidan talabalar uchun beriladigan imtiyozdan biror marta ham foydalana olmadim, desam ham bo‘laveradi.
Chegirmalar eʼlon qilinishi bilan chipta xaridi uchun harakatda bo‘laman. Afsuski, urinishlarim har doim chippakka chiqadi. Har doim bir xil bahona: onlayn biletlar bron qilinib bo‘lingan, vokzalga borsam xodimlardan bilet qolmadi (topilmadi, tugadi) degan javob olaman.
Bilet topishning imkonsizligi tashkiliy xatolar bilan bog‘liqmi?
O‘zbekistonda biletga chegirmalar taʼtilga juda qisqa muddat qolganida eʼlon qilinadi va tez tugaydi. Nega taʼtilga ketuvchi talabalar soni hisob-kitob qilinib shunga yarasha qo‘shimcha reys qo‘yilmaydi? Yetarli tayyorgarliksiz talabalarning oz qismigina bilet bilan taʼminlansa, unda chegirmaning nima keragi bor?
Talaba poyezd chiptasi sotib olmoqchi bo‘lsa, ko‘pincha bilet yo‘qligi sabab vokzal xodimlari unga avtobus yoki taksida ketishni maslahat berishadi. Baʼzan esa yo‘lovchilarga Urganch, Nukus kabi uzoq shaharlarga 12 soatlik safarni tik turib o‘tkazishga majbur bo‘ladigan dispetcher biletlar sotishadi. Poyezdda joy yo‘qligiga qaramay, yo‘lovchilar dispetcher chipta uchun to‘liq pul to‘laydi. Bu holatda, yo‘lovchilarning qulayligi umuman eʼtiborga olinmaydi. Xavfsizligini gapirmasa ham bo‘ladi.
2024 yil yakuni yaqin, bu yil ham bu kabi muammolarga duch kelmaslik uchun nimalar qilishi kerak? Talabadan tavsiya:
— chegirmalarni eʼlon qilish muddatini uzaytirish;
— O‘zbekiston temir yo‘llari tomonidan talabalar soni va ehtiyojlari hisobga olingan holda qo‘shimcha reyslarni yo‘lga qo‘yish;
— talabalarga bilet sotib olish uchun onlayn tizimni takomillashtirish va uni talabalar uchun qulayroq qilish;
— temir yo‘l xodimlarining bilet sotishda noqonuniy harakatlarining oldini olish bo‘yicha choralar ko‘rish;
— talabalar uchun alohida poyezdlarni yo‘lga qo‘yish.
O‘g‘iloy YUSUPOVA,
O‘zbekiston Milliy universiteti 4-bosqich talabasi
