Toshkent viloyatida “zakladchik”lar ushlandi
Hozirda holat yuzasidan tekshiruv olib borilmoqda.
Toshkent viloyati O‘rta Chirchiq tumanida o‘tkazilgan tezkor tadbirda 22-25 yoshdagi 3 nafar shaxs 3 gr sintetik giyohvandlik vositasini nazoratdagi xaridorga 1,7 mln so‘mga sotgan vaqtida daliliy ashyo bilan qo‘lga olindi.
Qo‘lga olinganlar orasidagi shaxs (X.G‘.) ning yonidan 6 gramm “marixuana” aniqlandi, sherigi (Sh.L.)ga tegishli mashinadan esa giyohvandlik moddasi isteʼmoli uchun maxsus yasalgan baklajka topildi.
Olib borilgan surishtiruvlar natijasida ushbu shaxslar internet orqali giyohvandlik vositalarini sotuvchi shaxslar bilan aloqada bo‘lib, “zakladchik” sifatida faoliyat yuritgani va ularga yuborilgan maxsus lokatsiyalar orqali sintetik giyohvandlik vositalarini olib, tarqatgani aniqlandi.
Tezkor tadbir davomida ushlagan shaxs (Sh.L.)ga yuborilgan so‘nggi lokatsiya asosida Qibray tumanida “Chinobod” mahallasi hududidan vazni 20 gr bo‘lgan sintetik giyohvandlik vositasi yashirilgan joydan ashyoviy dalil sifatida olindi.
Hozirda holat yuzasidan tergovga qadar tekshiruv harakatlari olib borilmoqda.
