27 ta konsert reklamasi bo‘yicha ogohlantirish berildi: ijro shakli ko‘rsatilmagan
Konsert-tomosha tadbirlarida fonogrammadan foydalanish haqida axborot berilishi shart.

Raqobat qo‘mitasi Instagram sahifalari va tashqi reklama obyektlarida joylashtirilgan 27 ta konsert reklamasida fonogramma yoki jonli ijro haqida ma’lumot berilmaganini aniqladi.
O‘rganish davomida Lolita, Ani Lorak, Mayot, Nikolay Fomenko, Izzat Shukurov, «Ummon» guruhi, Rayhon Gʻaniyeva va G‘aybulla Tursunov konsertlarining Instagram reklamalarida, shuningdek, Toxi$, «Mashina vremeni» va Otаr Kushanashvili ishtirokidagi dasturlarning tashqi reklamalarida qonunbuzilish holatlari qayd etildi.
Qo‘mita reklama beruvchilarga reklamalarni qonunchilik talablariga muvofiqlashtirish bo‘yicha ogohlantirishlar yuborgan.
Vazirlar Mahkamasining 2025-yil 8-apreldagi 207-son qaroriga muvofiq, konsert reklamasida ijro shakli «Jonli ijro», «Fonogrammadan foydalangan holda jonli ovoz» yoki «Fonogrammali konsert dasturi» kabi aniq iboralar bilan ko‘rsatilishi kerak.
«Reklama to‘g‘risida»gi qonunning 44-moddasiga ko‘ra, fonogrammadan foydalanilganda, reklamada uning qo‘llanish darajasi ham aks ettirilishi lozim. Tashqi reklamalar uchun bu ma’lumot reklama maydonining kamida 10 foizini egallashi kerak. Shuningdek, tashkilotchilar tomosha boshlanishidan oldin bu haqda audioxabardor qilishlari shart.
«Iste’molchilar huquqlarini himoya qilish to‘g‘risida»gi qonunning 6-moddasida ham konsert-tomosha tadbirlarida fonogrammadan foydalanish haqida axborot berilishi belgilangan.
Raqobat qo‘mitasi konsert tashkilotchilari va reklama beruvchilarni qonunchilik talablariga rioya qilishga chaqirdi. Talablar buzilishi davom etsa, belgilangan tartibda tegishli choralar ko‘rilishi mumkin.








