Kaspiy dengizi sohillarida mingdan ortiq o‘lik tyulenlar topildi
Ayni vaqtda olimlar ularning o‘limi sabablarini aniqlamoqda.
Qozog‘istonning Mang‘istau viloyatidagi Kaspiy dengizi sohilida mingdan ortiq tyulenlarning jasadi topildi, olimlar ularning o‘limi sabablarini aniqlamoqda. Bu haqida Gidrobiologiya va ekologiya instituti direktori Mirgaliya Baymukanov ma’lum qildi.
“O‘lik tyulenlar soni hozirda mingdan oshdi. Ehtimol, o‘lik hayvonlarning chiqishi to‘xtamaydi, bu bizning qirg‘oqlarimizda esayotgan g‘arbiy shamollar bilan bog‘liq va ular yana qirg‘oqqa chiqib qolishi mumkin. Tyulenlar sentyabr oxiridan shu kunga qadar aniqlandi”, - dedi Baymukanov.
Baymukonovning ta’kidlashicha, tyulenlarning nobud bo‘lishiga nima sabab bo‘lganini hozircha aniq aytib bo‘lmaydi. “Hozir biz material yig‘ish bosqichidamiz. Ularning nobud bo‘lish sababini aniqlash uchun ko‘plab tomonlarni jalb qilish kerak. Bular qandaydir ifloslantiruvchi chiqindilar, seysmik faollik ko‘rinishidagi tabiiy ofatlar bo‘lishi mumkin, ya’ni geologlar o‘z so‘zlarini aytishlari kerak. Virusologlar hayvonlarning nobud bo‘lishiga olib kelishi mumkin bo‘lgan viruslar bor-yo‘qligini aniqlaydi”, - deb tushuntirgan Mirgaliya Baymukanov .
Mutaxassisning qo‘shimcha qilishicha, nobud bo‘lgan tyulenlarning kichik guruhida zarar izlari topilgan, biroq bu ularning nobud bo‘lish sabablari haqida xulosa chiqarishga imkon bermaydi.
