Biznes-ombudsman devoni Namanganda press-tur o‘tkazdi
Tadbirkorlar huquqlarini himoya qilish borasida amalga oshirilayotgan ishlar bilan tanishish uchun 5 dekabr kuni Namangan viloyatida OAV va blogerlar uchun press-tur tashkil etildi.
Tadbirda Biznes-ombudsman devoni xodimlari hamda 20 ga yaqin OAV vakillari va blogerlar ishtirok etdi.
Dastlab Namangan viloyatida tadbirkorlarga yaratilayotgan shart-sharoitlar to‘g‘risida maʼlumot berilgandan so‘ng jurnalistlar O‘rta Osiyoda tibbiy ekspress laboratoriya mahsulotlari ishlab chiqarish bo‘yicha yagona bo‘lgan "Nam bio test" MCHJ faoliyati bilan yaqindan tanishdi.
"Nam bio test" MCHJ 2020 yilda tashkil topgan bo‘lib, qon tahlillari bo‘yicha innovatsion yechim topgan importni mahalliylashtirgan tadbirkorlik subyekti hisoblanadi.
Biznes-ombudsman yordami bilan loyiha tashkil etilib, 20 mlrd so‘mlik ekspress testlar yetkazib berish bo‘yicha shartnoma imzolangan.
Ekspress testlar hozirgi kunga qadar respublikaga import qilib olib kelingan. Hozirda ushbu tibbiyot mahsulotlari Namanganda ishlab chiqarilmoqda, Qo‘shni davlatlar va Rossiya Federatsiyasidan ro‘yxatdan o‘tkazish bo‘yicha dastlabki qadamlar qo‘yilgan.
Shundan so‘ng OAV vakillari “Laktalis agro” MCHJga yo‘l oldilar. Fransiya bilan qo‘shma korxonada 500 dan ortiq ishchi mehnat qiladi.
Korxona yonidan o‘tgan avtomagistral qurilish jarayonida yuqori kuchlanishli elektr liniyasi zarar ko‘rganligi sababli korxona faoliyati to‘xtab qolgan va saqlash tartibi buzilganligi sababli mahsulotlar laboratoriyadan o‘tmagani oqibatida korxona zarar ko‘rish arafasida bo‘lgan. Biznes-ombudsman aralashuvi bilan Namangan shahar hokimining farmoyishi qabul qilinib yo‘l qismi qayta qurilishi taʼminlangan va yuqori kuchlanishli elektr taʼminotidagi uzilish tiklangan.
Nazorat qiluvchi organlar tomonidan o‘tkazilgan tekshiruv davomida hisob raqamiga qo‘yilgan cheklov natijasida ishlab chiqarishning to‘xtashi oqibatida 1,6 mlrd zarar ko‘rish arafasida bo‘lgan. Bunday holatda Biznes-ombudsmanning aralashuvi bilan hisob raqamiga qo‘yilgan taqiq olib tashlangan.
Press-turning navbatdagi manzili “Gavhar” kompaniyasi bo‘ldi. 2020 yilda «Gavhar Jewel Group» MCHJ tarkibida tashkil etilgan kompaniya zargarlik buyumlari va esdalik sovg‘alari ishlab chiqaradi. Ishlab chiqarishda jahon anʼanalari, jumladan, italyan va o‘zbek zargarlik maktablarining tajribasidan foydalaniladi. Italiya, Turkiya va Germaniyaning zamonaviy texnologiyalari qo‘llaniladi.
Zargarlik oliygohi va mahalliy zargarlar kooperatsiyasini tashkil etish uchun Namangan viloyatida zargarlik buyumlarini ishlab chiqarish faoliyati bilan shug‘ullanuvchi yirik tadbirkorlarga Namangan Muhandislik texnologiya instituti huzuridagi “Sanoat va iqtisodiyot” texnikumi bino-inshootlarini imtiyozli shartlarda xususiylashtirish masalasini ko‘rib chiqish taklif kiritilishi natijasida hozirda ushbu faoliyatni boshlash uchun texnikum bino inshootlari kompaniyaga berilgan.
Mazkur takliflar davlatimiz rahbari tomonidan qo‘llab-quvvatlanib 2024 yilda bevosita korxonaga tashrif buyurilgan.
Press-tur doirasida Biznes-ombudsman matbuot kotibi Guljamol Shukurova ishtirokida jurnalistlar va OAV vakillari uchun “Tadbirkorlarning huquqlari va qonuniy manfaatlarini himoya qilishga qaratilgan sifatli media kontent yaratish” mavzusida seminar o‘tkazildi. Tadbir so‘ngida seminar ishtirokchilariga Biznes-ombudsmanning maxsus sertifikatlari topshirildi.
Namanganda tashkil etilgan ushbu press-tur tadbirkorlar muammolarini hal etish va ularning huquqlarini himoya qilish borasida Biznes-ombudsman devoni tomonidan amalga oshirilayotgan ishlarning yorqin namunasi bo‘ldi.
