O‘zbekiston MDH mamlakatlari orasida "eng yaxshi sayohat yo‘nalishi" deb topildi
Bu haqida Turizm qo‘mitasi maʼlum qildi.
O‘zbekiston Rossiyaning “Russian traveler” jurnali tomonidan tashkil etilgan "Russian traveler Awards 2024” milliy turizm mukofotining ekspert hakamlar hayʼati tanlovi natijasiga ko‘ra “Turizm v SNG” nominatsiyasida g‘olib deb topildi. Taqdirlash marosimida Turizm qo‘mitasi raisining birinchi o‘rinbosari Jamshid Abdusalomov boshchiligidagi O‘zbekiston delegatsiyasi ishtirok etdi.
Maʼlumot uchun: “Russian traveler” jurnali — bu mamlakat ichida sayohat qilish va mashhur xalqaro yo‘nalishlarga bag‘ishlangan rus nashridir. U sayohat g‘oyalari, ekspert maslahatlari va jonli fotosuratlar bilan maqolalarni taklif etadi. Jurnalning birinchi soni 2022 yilda Sankt-Peterburg xalqaro iqtisodiy forumida taqdim etilgan.
Jurnal, shuningdek, Rossiyadagi eng yaxshi sayyohlik yo‘nalishlari, mehmonxonalar, kruizlar va turizmning boshqa jihatlarini eʼtirof etuvchi har yili “Russian traveler” mukofotlarini tashkil qiladi.
Joriy yil iyul oyida Rossiyaning mazkur jurnali O‘zbekistonning turizm salohiyatiga bag‘ishlangan “O‘zbekiston — Sharq ertagi” («Uzbekistan – Vostochnaya skazka») nomli maxsus soni chop etilgan bo‘lib, rus kitobxonlari orasida katta qiziqish uyg‘otgan.
