TIME jurnali Trampni "Yil odami" deb e’lon qildi
2023-yilda bu unvonni xonanda Teylor Svift olgan edi.
12-dekabr kuni TIME jurnali Donald Trampni 2024-yil odami deb e’lon qildi. 1927-yildan beri TIME jurnali "yaxshi yoki yomon bo‘lishidan qat’i nazar", so‘nggi 12 oy ichida dunyoga eng katta ta’sir ko‘rsatgan shaxs, guruh yoki konsepsiyani tanlab kelmoqda. 2023-yilda bu unvonni xonanda Teylor Svift olgan edi.
Tramp bilan bir qatorda 2024-yilgi nomzodlar ro‘yxatida AQSh vise-prezidenti Kamala Harris, Uels malikasi Keyt Middlton, tadbirkor Ilon Mask, rossiyalik muxolifatchi Aleksey Navalniyning bevasi Yuliya Navalnaya, Isroil bosh vaziri Binyamin Netanyahu, AQSh Federal zaxira tizimi raisi Jerom Pauell, podkaster Jo Rogan, Meksika prezidenti Klaudiya Sheynbaum, Meta bosh direktori Mark Sukerberg va boshqalar ham bor edi.
Donald Tramp 2024-yilda Respublikachilar partiyasidan AQSh prezidenti saylovida nomzod bo‘ldi va katta ustunlik bilan g‘alaba qozondi. Saylovoldi kompaniyasi davrida unga nisbatan suiqasd uyushtirildi. U 2025-yil yanvar oyida prezidentlik davrining ikkinchi muddatiga kirishadi.
