Yun Sok Yol vaqtinchalik lavozimidan chetlatildi
Uning vakolatlari bosh vazirga o‘tkazildi.
Milliy assambleya tomonidan impichment eʼlon qilinganidan so‘ng prezident Yun Sok Yol bu masala Konstitutsiyaviy sud tomonidan ko‘rib chiqilgunga qadar lavozimidan chetlashtirildi.
Konstitutsiyaviy sud uning o‘z vazifalarini bajarishda davom etishi yoki yo‘qligi haqida qaror qabul qilishi kerak. Bu vaqt ichida mamlakat bosh vaziri Xan Dak Su muvaqqat prezident vazifasini bajaradi.
Ayni paytda Assambleyaning Yunga nisbatan impichment eʼlon qilish qarori sudga taqdim etilgan va qarorni muhokama qilish jarayoni boshlangan. Rasmiylar bu masala bo‘yicha yig‘ilish 16 dekabr kuni o‘tkazilishini aytgan.
Maʼlumot uchun, impichment jarayoni bilan bog‘liq dalillarni tinglash va baholash uchun tinglovlarni o‘tkazadigan sud 6 oy muddatda impichmentni tasdiqlash yoki rad etishi mumkin. Agar sudning 9 nafar sudyasidan 6 nafari qarorni maʼqullasa, rahbar lavozimidan chetlashtiriladi.
