AQSh Eronga yangi zarbalar berishga tayyorlanmoqda: ehtimoliy sana ma’lum qilindi
Oq uyda 4–5-noyabr kunlari Donald Tramp va milliy xavfsizlik jamoasi Eronga zarbalarni qayta boshlash masalasini muhokama qilgan.
AQSh ma’muriyati Eronga qarshi harbiy zarbalarni 9-noyabr kuni qayta boshlash imkoniyatini ko‘rib chiqmoqda. Bu haqda Fox News telekanali ma’muriyatdagi manbalarga tayanib xabar berdi.
Telekanal suhbatdoshlariga ko‘ra, 9-noyabr kuni yangi oy sababli tunda oy yorug‘ligi deyarli bo‘lmaydi. Harbiy amaldorlar bunday sharoit operatsiya o‘tkazish uchun qulay bo‘lishi mumkinligini bildirgan.
Manbalarning aytishicha, Oq uyda 4–5-noyabr kunlari prezident Donald Tramp va uning milliy xavfsizlik bo‘yicha jamoasi o‘rtasida Eronga zarbalarni qayta boshlash masalasi muhokama qilingan.
Fox News ma’lumotiga ko‘ra, AQSh Markaziy qo‘mondonligi (CENTCOM) Eronda yirik harbiy operatsiyalarni qayta boshlashga tayyorgarlikni yakunlamoqda. Biroq Vashingtondan yangi ko‘rsatma olgani haqida ma’lumot yo‘q.
Avvalroq Donald Tramp Eronga nisbatan uchta ehtimoliy yo‘lni ko‘rib chiqayotgani xabar qilingandi: yangi zarbalar berish, Tehronga iqtisodiy bosimni davom ettirish yoki kelishuvga erishish.
Eslatib o‘tamiz, AQSh va Eron o‘rtasidagi mojaro 28-fevralda boshlangan. Iyun oyida tomonlar harbiy harakatlarni to‘xtatishga qaratilgan o‘zaro anglashuv memorandumini imzolagan, biroq keyinchalik vaziyat yana keskinlashgan.
Hozirda Eron delegatsiyasi Qatarda vositachilar orqali AQSh bilan muzokaralar olib bormoqda. Reuters manbasiga ko‘ra, Tehron o‘zining yadroviy dasturi bo‘yicha Vashingtonga takliflar ham taqdim etgan.
