Putin va Zelenskiyga maktub: Melaniya Tramp Rossiya va Ukraina vakillari bilan uchrashdi
Uchrashuvda Oleshki shahridagi gumanitar operatsiya va ikki davlat bilan hamkorlik masalalari muhokama qilindi.
5-noyabr kuni AQShning birinchi xonimi Melaniya Tramp Oq uyda Rossiya va Ukraina vakillarini qabul qildi. Uchrashuv oktyabr oyi oxirida Xerson viloyatining Oleshki shahrida o‘tkazilgan gumanitar operatsiyadan so‘ng tashkil etildi.
Rossiya delegatsiyasi tarkibida Rossiya Inson huquqlari bo‘yicha vakili Yana Lantratova va prezidentning xorijiy davlatlar bilan investitsiyalar hamda iqtisodiy hamkorlik bo‘yicha maxsus vakili Kirill Dmitriyev ishtirok etdi. Ukrainani esa mamlakat ombudsmani Dmitriy Lubinets va “Xalq xizmatkori” fraksiyasi rahbari David Araxamiya vakillik qildi.
Melaniya Tramp Oleshki shahridagi gumanitar operatsiya keng ko‘lamli tinchlikka olib kelishiga umid bildirgan. Uning ta’kidlashicha, har qanday muhim o‘zgarish kichik bir qadamdan boshlanadi.
Birinchi xonim operatsiyani rejalashtirishning barcha bosqichlarida ishtirok etganini aytgan. Jumladan, minalardan tozalash rejalari va sun’iy yo‘ldosh tasvirlari bilan tanishgan, yo‘llarni baholash, evakuatsiya yo‘nalishlari, shifoxonalarga kirish imkoniyati, transport hamda tibbiy vositalar masalalarini muhokama qilgan.
U Rossiya va Ukraina tomonlarining sulh davridagi harakatlarini ham yuqori baholagan. Uning so‘zlariga ko‘ra, gumanitar xodimlar, harbiylar va ikki davlat rasmiylari operatsiyaning barcha bosqichlarini muvofiqlashtirish uchun birgalikda ishlagan.
Uchrashuv davomida Melaniya Tramp Rossiya prezidenti Vladimir Putin va Ukraina prezidenti Vladimir Zelenskiyga yozgan maktublarini ham tilga olgan. Uchrashuv ishtirokchilaridan ushbu xatlarni davlat rahbarlariga yetkazishni so‘ragan.
Rossiya prezidentiga maktubni Kirill Dmitriyev topshirishi kutilmoqda. U Melaniya Tramp Oleshki shahridagi operatsiya muvaffaqiyatida muhim rol o‘ynaganini ta’kidlab, birinchi xonim gumanitar faoliyatini davom ettirishiga umid bildirgan.
Dmitriyevning aytishicha, Moskva va Vashington oilalarni birlashtirish hamda bolalarni himoya qilishga qaratilgan gumanitar yo‘nalishdagi hamkorlikni davom ettirishi kerak.
