Turkiyadagi qurolli hujum: sakkiz kishi halok bo‘ldi
Halok bo‘lganlar orasida ikki nafar o‘qituvchi ham bor.
Turkiyaning Afyonkarahisar viloyatida sodir bo‘lgan qurolli hujum oqibatida sakkiz kishi halok bo‘ldi, yana bir kishi og‘ir jarohat oldi. Hodisa yuzasidan keng qamrovli tergov harakatlari olib borilmoqda.
Afyonkarahisar viloyati gubernatorligi ma’lumotiga ko‘ra, qurolli hujum 5-noyabr, payshanba kuni kechqurun viloyatdagi uchta qishloqda sodir bo‘lgan. Qurbonlarning jasadlari Ihsaniye tumanidagi Yukaritandir, Kiyir va Ayazini qishloqlaridan topilgan.
Anadolu axborot agentligi xabar berishicha, Yukaritandir qishlog‘idagi yo‘lda o‘qotar quroldan jarohatlangan ikki ayol aniqlangan. Ular shifoxonaga olib ketilganiga qaramay, vafot etgan. Kiyir qishlog‘ida yana uch kishining, Ayazini qishlog‘ida esa uch kishining jasadi topilgan. Qurbonlar orasida ikki nafar o‘qituvchi ham borligi xabar qilingan.
Viloyat hokimligi bayonotida hujum oqibatida jami sakkiz nafar fuqaro halok bo‘lgani va bir kishi og‘ir jarohat olib, shifoxonaga yotqizilgani tasdiqlangan.
Dastlabki ma’lumotlarga ko‘ra, hujumchi nasosli miltiqdan foydalangan va voqea joyidan qizil avtomobilda qochib ketgan. Shundan so‘ng jandarmeriya hujum sodir bo‘lgan hududlardagi kirish va chiqish yo‘llarini nazoratga olib, gumondorni qidirish bo‘yicha keng ko‘lamli operatsiya boshlagan.
Keyinchalik Eskishehir viloyati gubernatorligi shaharda gumondor qo‘lga olinganini ma’lum qilgan.
Hozirda hujumning barcha tafsilotlari, jumladan, uning sabablari va gumondorning maqsadlari aniqlanmoqda.
