Toshkent aeroportida salkam 110 ming dollar to‘xtatib qolindi
So‘nggi kunlarda aeroportda valyutalarni yashirincha olib chiqishga bo‘lgan urinishlar ortdi.
Qayd etilishicha, bojxonachilar salkam 110 ming AQSH dollari miqdoridagi naqd xorijiy valyutalarning noqonuniy olib chiqilishiga chek qo‘yishdi.
Jumladan, Nyu-Yorkka parvozi oldidan yo‘lovchilardan biri qo‘l sumkasidagi 42 200 AQSH dollari haqida bojxona xodimlariga na og‘zaki, na yozma tarzda maʼlum qilishni “unutib” qo‘yibdi.
Istanbulga uchib ketayotgan 2 nafar yo‘lovchilardan birining 19 900 AQSH dollarini, ikkinchisining esa 18 200 AQSH dollarini qo‘l sumkalarida “bamaylixotir” olib chiqishga urinishlari naf bermadi.
Yangi yilning ilk kunida esa Pekinga safarga otlangan xorijiy fuqaro yo‘lovchi bojxona deklaratsiyasida va bojxona xodimlarining og‘zaki so‘rovi paytida maʼlum qilmasdan turib, 12 200 AQSH dollarini olib chiqayotgan vaqtida to‘xtatib qolindi.
Shuningdek, bojxona xodimlari Bishkekka uchib ketayotgan yo‘lovchining 4450 AQSH dollarini va Nyu-Yorkka uchib ketayotgan yo‘lovchining 11 810 AQSH dolalarini noqonuniy olib chiqishga bo‘lgan urinishini bartaraf etishdi.
Hozirda mazkur holatlar yuzasidan bojxona tekshiruvlari davom ettirilmoqda.
