Xitoyda Registonning muzdan ishlangan maketi namoyish etildi
Xarbin shahrida 26-qishki muz va qor festivali o'tkazilmoqda.
Xitoyning Xarbin shahridagi "Muz va qorning katta olami" tematik parkida 26-qishki muz va qor festivali ochildi.
An’anaviy festivalning asosiy diqqatga sazovor joylaridan biri Samarqanddagi Registon maydonining muzdan ishlangan maketidir. Tashkilotchilarning ma’lumotiga ko‘ra, qorli shaharchani qurish uchun jami 300 ming kub metr muz va qor sarflangan.
Shaharcha to‘qqizta asosiy zonaga bo‘lingan bo‘lib, ularda Osiyo Olimpiya Kengashiga a’zo 42 ta mamlakat va 3 ta hududning diqqatga sazovor joylari maketlari yaratilgan. Uning dizayni va qurilishida 2025-yil 7-fevral kuni Xarbinda boshlanadigan qishki Osiyo o‘yinlari elementlaridan foydalanilgan.
Tashrif buyuruvchilar mingdan ortiq g‘aroyib hamda rang-barang yoritgichli muz va qor haykallarini, shu jumladan, Osiyo davlatlarining namunaviy binolarida tasvirlangan art-ob’yektlarini ko‘rishlari mumkin. Bu yerda har bir kishi uchun turli madaniy tadbirlar va qishki ko‘ngilochar dasturlardan bahramand bo‘lish imkoniyati mavjud.
