Turkiyada firibgarlar 45 ming yilga qamaldi
Ular moliyaviy piramida tashkil etgan.
Turkiyada moliyaviy piramida tashkil etgan aka-uka Mehmet va Fatih Aydin 45 ming yil 3 oyga ozodlikdan mahrum etildi. Ularning tuzog‘iga tushgan jabrlanuvchilar soni o‘n minglab kishiga yetgan.
2016 yilda Aydin aka-ukalari sarmoyani onlayn o‘yin bilan birlashtirish g‘oyasini o‘ylab topishdi. Ular "Fermer banki" nomli o‘yin yaratib, foydalanuvchilarga investitsiya kiritish evaziga virtual fermer xo‘jaliklarini rivojlantirish imkoniyatini taklif qilishdi. Firibgarlar bu mablag‘lar haqiqiy qishloq xo‘jaligi texnikasi, chorva mollari va boshqa aktivlarni sotib olishga sarflanishini aytishgan.
Shuningdek, ular ishlab chiqarilgan mahsulotlar maxsus do‘konlarda sotilishini va o‘yin ishtirokchilari bu jarayondan foyda ko‘rishini vaʼda qilishdi. Ammo haqiqat boshqacha bo‘lib chiqdi — loyiha moliyaviy piramida sifatida fosh etildi va egalaridan biri $100 milliondan ortiq mablag‘ bilan g‘oyib bo‘ldi.
Firibgarlarning rekord darajadagi jazo muddati ular ustidan berilgan 4 mingdan ortiq shikoyatlar bo‘yicha hukmlar yig‘indisi asosida belgilandi. Dastlab, Turkiya prokuraturasi ularni 88 ming yilga ozodlikdan mahrum etishni talab qilgan edi.
