Ukrainadagi urush qachon tugashi maʼlum qilindi
Bu bo‘yicha deklaratsiya 9 maygacha eʼlon qilinishi mumkin.
AQSH prezidenti Donald Tramp o‘zining tinchlik rejasiga muvofiq, ukrainalik hamkasbi Vladimir Zelenskiyni Pasxa bayramigacha Rossiya bilan o‘t ochishni to‘xtatishga rozi bo‘lishga ko‘ndirishi mumkin.
Rossiya va Ukraina o‘rtasidagi mojaroni bir kunda to‘xtata olaman deb kelgan Tramp endi urushni 100 kunda to‘xtatish ustida ishlamoqda. Tasdiqlanmagan maʼlumotlarga ko‘ra, Ukrainaning siyosiy va diplomatik doiralarida 20 aprelgacha o‘t ochishni to‘xtatishni nazarda tutuvchi qandaydir reja muhokama qilinmoqda.
“Bu Rossiyaning hujumini to‘xtatish, Ukrainaning NATOga qo‘shilishini taqiqlash va Kiyevdan noqonuniy bosib olingan hududlar ustidan Rossiya suverenitetini tan olishni talab qiladi”, deyiladi xabarda.
Bunga qo‘shimcha ravishda, Ukraina qo‘shinlari avgust oyida qarshi hujum boshlagan Rossiyaning Kursk viloyatini tark etishga majbur bo‘ladi. Tarkibiga Britaniya askarlari ham kirishi mumkin bo‘lgan yevropa harbiy kontingenti esa qurolsizlantirilgan hududni qo‘riqlash uchun jalb etiladi. AQSH qo‘shinlari ushbu kontingent tarkibiga kirmaydi.
O‘t ochishni to‘xtatish rejalarini amalga oshirish fevral oyi boshida Zelenskiy va Rossiya prezidenti Vladimir Putinning telefon orqali muloqoti, fevral oyi oxiri — mart oyi boshida ularning uchrashuvi va 20 aprelgacha o‘t ochishni to‘xtatish to‘g‘risidagi rasmiy bayonot bilan boshlanadi, deyiladi xabarda.
Urushni to‘xtatishning kelishilgan parametrlari to‘g‘risidagi deklaratsiya 9 mayga qadar eʼlon qilinishi kutilmoqda. Shundan so‘ng Kiyevga harbiy holatni uzaytirmaslik va qo‘shinlarni safarbar qilishni bekor qilish taklif etiladi.
Tramp, shuningdek, urushni to‘xtatish bo‘yicha kelishuvni ishlab chiqishga ko‘maklashish uchun boshqa davlatlar vositachiligida Xalqaro tinchlik konferensiyasini tashkil etishni xohlaydi.
Eʼlon qilingan rejalarning ko‘plab bandlari Ukraina tomonidan yon berishni nazarda tutadi. Ammo Tramp Amerika ukrainalik harbiylarni qo‘llab-quvvatlashini davom ettirishni, 2030 yilgacha Yevropa ittifoqiga aʼzo bo‘lish imkoniyatini ko‘rib chiqishni rejalashtirmoqda.
