AQShda tuxum inqirozi kuzatilmoqda
Restoranlar narxlarni oshirdi, do‘konlarda o‘g‘irlik avj olmoqda.
AQShda tuxum narxining keskin oshishi jamoat ovqatlanish joylarini qiyin ahvolga solib qo‘ydi, xaridorlarni esa moliyaviy imkoniyatlarini qayta ko‘rib chiqishga majbur qilmoqda. So‘nggi ikki yil ichida tuxum narxi o‘rtacha 65 foizga oshdi, shundan 40 foiz o‘sish faqatgina 2023-yil dekabridan 2024-yil dekabrigacha bo‘lgan davrga to‘g‘ri keladi.
Bu inqirozning asosiy sababi 2022-yildan beri davom etayotgan parranda grippi epidemiyasi bo‘lib, u AQShdagi 145 milliondan ortiq tovuq va boshqa uy parrandalarining yo‘q qilinishiga olib keldi. 2024-yil oxirida kasallik yana avj oldi va faqat noyabr-dekabr oylarida 17 million parranda yo‘q qilindi.
Natijada tuxum narxi keskin ko‘tarildi: 2024-yil dekabrida 12 dona tuxum o‘rtacha 3,65 dollardan sotilgan bo‘lsa, yanvar oxiriga kelib narx 4,15 dollarga yetdi. AQSh qishloq xo‘jaligi vazirligi ma’lumotlariga ko‘ra, 2025-yilda narx yana 20 foizga oshishi kutilmoqda.
AQSh Milliy restoran assotsiatsiyasi (NRA) tuxum tanqisligidan eng ko‘p zarar ko‘rgan joylardan biri umumiy ovqatlanish sohasi ekanligini ta’kidlamoqda.
Georgia shtatida joylashgan mashhur Waffle House tarmog‘i, mamlakat bo‘ylab 2 mingdan ortiq restoranlarga ega bo‘lib, har yili 272 million tuxum iste’mol qiladi. Ushbu tarmoq tuxum taqchilligi sababli har bir tuxumga qo‘shimcha 50 sent narx qo‘shishga majbur bo‘ldi.
Komila Odilova tayyorladi
