Yer harorati rekord darajada isimoqda
Asosiy sabab atmosferada issiqxona gazlarining to‘planishi.
Amerikalik olim Jeyms Hansen va uning hamkasblari global isish tobora kuchayib borayotganini maʼlum qildi. Ularning bu haqdagi tadqiqoti “Environment: Science and Policy for Sustainable Development” jurnalida eʼlon qilindi.
Tadqiqotchilarning xulosalari ilmiy jamoatchilik orasida bahsli bo‘lib qolayotgan bo‘lsa-da, Copernicus dasturi hisob-kitoblariga ko‘ra, 2025 yil yanvar oyi 2024 yilning shu oyiga nisbatan 0,09 daraja (0,16°F) issiq bo‘ldi. 2024 yilning yanvari esa shu paytgacha kuzatilgan eng issiq yanvar bo‘lib, o‘rtacha harorat sanoatgacha bo‘lgan davrdagi ko‘rsatkichdan 1,75 daraja (3,15°F) yuqori bo‘lgandi.
Bundan tashqari, so‘nggi 19 oydan 18 tasida global harorat xalqaro kelishuvlarda belgilangan 1,5 daraja (2,7°F) chegarasiga yetgan yoki undan oshib ketgan.
Nima sababdan global harorat oshmoqda?
Mutaxassislarning taʼkidlashicha, asosiy sabab atmosferada issiqxona gazlarining to‘planishi. Biroq tabiiy omillar kutilganidan boshqacha taʼsir ko‘rsatmoqda. Yevropa meteorologiya agentligining iqlim bo‘yicha strategi Samanta Berdjessning tushuntirishicha, ekvatorial Tinch okeanidagi tabiiy o‘zgarishlar odatda global haroratga katta taʼsir qiladi.
Masalan, El-Ninyo (Markaziy va Sharqiy tropik Tinch okeanida dengiz sathining harorati ko‘tarilishi bilan bog‘liq tabiiy iqlim hodisasi) kuchayganda global harorat keskin ko‘tariladi. 2024 yilda kuchli El-Ninyo kuzatilgan bo‘lsa-da, u iyun oyida tugagan, biroq yil rekord darajada issiq bo‘lgan.
