Chiqindilarni kamaytirish uchun qo‘shimcha soliq joriy etilishi mumkin
Bu bo‘yicha keskin choralar ko‘rilishi kutilmoqda.
Yevropa Ittifoqi (YI) tarixda ilk bor aʼzo davlatlar uchun oziq-ovqat chiqindilarini kamaytirish bo‘yicha qonuniy majburiyatlar joriy qildi. Yangi kelishuvga ko‘ra, 2030 yilgacha chakana savdo, restoranlar va uy xo‘jaliklari oziq-ovqat chiqindilarini 30 foizga qisqartirishi lozim.
Shuningdek, oziq-ovqat ishlab chiqaruvchilari va qayta ishlovchilari chiqindilarni kamida 10 foizga kamaytirish majburiyatini oladi. Rasmiy hisob-kitoblarga ko‘ra, Yevropada har yili 59 million tonna oziq-ovqat chiqindisi hosil bo‘lib, bu 132 milliard yevro zarar keltirmoqda.
Kelishuv, shuningdek, to‘qimachilik sanoatini ham o‘z ichiga oldi. Yangi qonunlarga ko‘ra, moda brendlari va ishlab chiqaruvchilar mahsulotlarining barqarorligi va ekologik taʼsiriga qarab chiqindilarni yig‘ish, saralash va qayta ishlash uchun moliyaviy hissa qo‘shishlari shart bo‘ladi.
Yangi qoidalar arzon va tez eskiradigan kiyimlar ishlab chiqaruvchi brendlarga qo‘shimcha soliqlar kiritishi mumkin. Qonunchilik, shuningdek, agressiv reklama kampaniyalari orqali isteʼmolchilarni tez-tez kiyim almashtirishga undaydigan kompaniyalarni ham nishonga oladi.
Bitim hozircha dastlabki hisoblanib, Yevropa Ittifoqi Kengashida hukumat vakillari tomonidan tasdiqlanishi kutilmoqda.
