Farg‘onadagi kompyuter klubida janjal yuz berdi
Hozirda voqea ishtirokchilari javobgarlikka tortilgan.
21-fevral kuni Farg‘ona shahri Oqtov ko‘chasida joylashgan kompyuter klubida yetti nafar tanish o‘yin davomida baland ovozda bahslashgani sababli klub ish boshqaruvchisi F.Xudoynazarov ularga e’tiroz bildirgan.
Bu holat o‘zaro kelishmovchilikka sabab bo‘lib, fuqaro O.Vallomov ish boshqaruvchisining yuziga musht tushirgan. Shundan so‘ng, uning sheriklari ham janjalga qo‘shilgan.
Hozirda ushbu holat yuzasidan Jinoyat kodeksining 277-moddasi 3-qismi “g” bandi bo‘yicha jinoyat ishi qo‘zg‘atilgan. Gumonlanuvchilar O.Vallomov, M.Qodirov va N.Mahmudjonovga nisbatan qamoqqa olish tarzidagi ehtiyot chorasi qo‘llangan.
Shuningdek, janjalda ishtirok etgan yana uch kishiga nisbatan ma’muriy bayonnoma rasmiylashtirilgan. Mazkur holat viloyat IIB tomonidan nazoratga olinib, qonuniy chora ko‘rilishi ta’minlanadi.
