Saida Mirziyoyevaning sa’y-harakatlari tufayli Apple Pay va Google Pay tizimlari O‘zbekiston to‘lov tizimlariga integratsiya qilindi
Xizmatlar kundalik hisob-kitoblarni soddalashtirish, naqd pulga ehtiyojni kamaytirish va xorijiy sayyohlar uchun qulaylik yaratishga xizmat qiladi.
O‘zbekistonda xalqaro raqamli to‘lov xizmatlarini joriy etish bo‘yicha yangi bosqich boshlandi. Mamlakatda Google Pay va Apple Pay xizmatlari ishga tushirildi. Bu haqsa Prezident Adminstratriyasi rahbari Saida Mirziyoyeva oʻzining Telegram-kanalida ma'lum qildi.
Jarayonda Saida Mirziyoyevaning tashabbuslari va muzokaralari muhim ahamiyat kasb etgan.
Xususan, Google kompaniyasi vitse-prezidenti Karan Bhatia bilan uchrashuvda xalqaro to‘lov tizimlaridan foydalanish uchun zarur huquqiy va texnologik sharoitlarni yaratish masalalari muhokama qilingan.
Mazkur xizmatlarning joriy etilishi fuqarolar va xorijiy mehmonlarga smartfon orqali kontaktsiz to‘lovlarni amalga oshirish imkoniyatini kengaytiradi. Bu kundalik hisob-kitoblarni soddalashtirish, naqd pulga ehtiyojni kamaytirish va sayyohlar uchun qo‘shimcha qulayliklar yaratishga xizmat qiladi.
Shuningdek, xalqaro raqamli to‘lov xizmatlarining yo‘lga qo‘yilishi O‘zbekistonning to‘lov infratuzilmasini xalqaro standartlarga yaqinlashtirish hamda global texnologik hamkorlikni kengaytirish uchun yangi imkoniyatlar ochadi.
