Xorijda tajriba orttirgan shifokorlarga 50 mln so‘mgacha ustama to‘lanadi
Tibbiyot xodimlarining uy-joy sharoitini yaxshilash uchun 50 milliard so‘m ajratiladi.
Davlat rahbari shifokor mehnatining qadri haqida so‘z yuritar ekan, maʼrifatparvar alloma Abdurauf Fitratning “Insonga xizmat qilgan har bir soha muqaddas, ammo inson sog‘lig‘iga xizmat qilgan soha – ulug‘roqdir” degan so‘zlarini esladi.
Tizimda kamida 15 yil ishlagan tibbiyot xodimlarining ipoteka krediti bir qismini qoplash uchun 50 milliard so‘m ajratildi. Ushbu imkoniyat orqali kelasi yili 1 ming nafar tibbiyot xodimi yangi uyga ko‘chib o‘tadi.
Yosh kadrlarni ham qo‘llab-quvvatlash maqsadida har yili 500 nafar yosh tibbiyot xodimining ipoteka krediti boshlang‘ich badalining 25 foizi qoplab beriladi.
Kelgusi yildan olis hududlarda ishlaydigan barcha shifokorlarning oylik qo‘shimcha ustamasi 2 million so‘mdan 4,5 million so‘mga oshiriladi. Bunday hududlarga ishga kirgan shifokorlarga 50 million so‘m miqdorida bir martalik rag‘bat puli ham beriladi.
Shuningdek, xorijiy klinikalarda tajriba orttirgan vatandosh shifokorlarni mamlakat shifoxonalariga jalb etish rejalashtirilgan.
“Biz ularni o‘zimizdagi shifoxonalarga olib kelib, Yangi O‘zbekiston tibbiyotida o‘z maktabini yaratishiga xizmat qiladigan yangi tizimni yo‘lga qo‘yamiz”, — dedi Prezident.
Bunday mutaxassislarning oylik ish haqiga 50 million so‘mgacha ustama to‘lanadi, ish joylari esa zamonaviy uskunalar bilan jihozlanadi.
Ularga o‘z atrofida kuchli jamoa shakllantirish, birga ishlaydigan shifokorlar, assistentlar va hamshiralarni mustaqil tanlash imkoniyati beriladi. Bundan tashqari, nufuzli konferensiyalarda qatnashish hamda xorijdagi hamkasblari bilan tajriba almashish xarajatlari qoplanadi.
Mazkur ishlar 26 ta ixtisoslashgan markazdan boshlanadi. Har bir markaz direktori kelasi yili 5–10 nafardan vatandosh shifokorni jalb etishga masʼul bo‘ladi.
