Kuvaytda o‘zbekistonlik ishchilarga ehtiyoj ortmoqda
Ikki davlat o'rtasidagi ishchi migratsiyasi bo‘yicha hamkorlik kuchaytiriladi.
O‘zbekiston delegatsiyasi Kuvaytga tashrif buyurib, ushbu mamlakatda o‘zbekistonlik ishchilarni ish bilan ta’minlash masalasida muzokaralar olib bordi. Safar O‘zbekiston Respublikasining Kuvaytdagi elchixonasi ko‘magida tashkil etildi. Unda O‘zbekiston Vazirlar Mahkamasi huzuridagi Migratsiya agentligi va Tashqi ishlar vazirligi Konsullik-huquqiy departamenti vakillari ishtirok etdi.
Tashrif davomida delegatsiya Kuvaytning nufuzli kompaniyalari — Kuwait Agriculture Company, Gulf Care Trade, AlJaber Group Holding, NBTC Group, Me Career, Brunel Energy Kuwait, Diversity Tech hamda Courtyard by Marriott mehmonxonasi rahbariyati bilan uchrashdi. Muzokaralarda O‘zbekistondan malakali ishchi kuchini jalb qilish, kasbiy va til o‘qitish markazlarini tashkil etish, tanlovlar o‘tkazish hamda qo‘shma loyihalarni amalga oshirish masalalari muhokama qilindi.
O‘zbekiston tomoni kelajakda Kuvayt kompaniyalari tomonidan beriladigan talabnomalar asosida ushbu mamlakatda ishlash istagida bo‘lgan nomzodlarni taqdim etishga tayyorligini bildirdi. Muzokaralar natijasida tomonlar hamkorlikni rivojlantirish maqsadida o‘zaro anglashuv memorandumlarini ishlab chiqish va imzolashga kelishib oldilar.
