4 ta viloyatda noqonuniy yer savdosi fosh bo‘ldi
Hozirda gumonlanuvchilarga nisbatan jinoiy ish ochilgan.
Davlat xavfsizlik xizmati va Bosh prokuratura huzuridagi Departament tomonidan o‘tkazilgan tezkor tadbirlarda turli viloyatlarda noqonuniy yer savdosi bilan bog‘liq holatlar aniqlandi.
Navoiy viloyatida tadbirkor 1 gektar yer maydonini o‘ziga tegishli deb ko‘rsatib, uni 2 milliard so‘mga sotmoqchi bo‘lgan. U 1 milliard so‘m olgan vaqtida qo‘lga olindi. Andijon viloyatida esa aka-uka davlat zaxirasidagi 2 gektar yerni 300 ming AQSH dollariga sotishga uringan, ulardan biri 50 ming dollar olganida ushlandi.
Farg‘onada fermer xo‘jaligi rahbari 50 sotix yer maydonini 55 ming AQSH dollariga sotishga kelishib, 45 ming dollarni olganida qo‘lga tushdi. Toshkent viloyatida esa davlat zaxirasidagi 16 sotix yerni 352 ming AQSH dollariga sotmoqchi bo‘lgan fuqaro va uning sherigi oldindan 30 ming dollar olgan vaqtida ushlanib, noqonuniy harakatlariga chek qo‘yildi.
Barcha gumonlanuvchilarga nisbatan Jinoyat kodeksining tegishli moddalari bo‘yicha ish ochilib, tergov harakatlari olib borilmoqda.
