Hindistonlik selektsioner noyob it sotib oldi
Kadabomb Okami – tarixdagi eng qimmat itga aylandi.
Sakkiz oylik Kadabomb Okami nomli it 5,7 million dollarga sotilib, dunyodagi eng qimmat itga aylandi. Uning bunday yuqori narxda sotilishiga noyobligi sabab bo‘ldi — u yovvoyi bo‘ri va Kavkaz cho‘pon itining yagona gibrididir.
Sotuv paytida kuchukchaning vazni 75 kilogramm, bo‘yi esa 76 santimetr bo‘lgan. Uni Hindistonning Bangalor shahridan bo‘lgan S. Satish ismli 51 yoshli selektsioner xarid qildi. Satish ilgari itlarni ko‘paytirish bilan shug‘ullangan bo‘lsa-da, hozirda butun dunyo bo‘ylab noyob zotlarni izlab topish va Hindistonda namoyish etish bilan band.
Satishning itlari ulkan fermada saqlanadi, ularning har biri uchun alohida uy qurilgan. Fermada hayvonlarga g‘amxo‘rlik qiluvchi olti nafar xodim ishlaydi. It yetishtiruvchisi o‘z uy hayvonlari nafaqat yaxshi sharoit, balki yetarlicha mehr va g‘amxo‘rlik ham olishini ta’kidlaydi.
