Sirdaryoda stadionda haydalgan Captiva auksionda sotildi

 

Sirdaryo viloyatining Sayxunobod tumanida stadionga boshqarib tushirilgan va odamlar ustiga haydalgan Captiva auksion orqali 100 million so‘mga sotildi. Sotuvdan tushgan mablag‘ davlat daromadiga o‘tkazildi.

 

2024-yil 29-may kuni mast holdagi haydovchi o‘zining Captiva avtomashinasini Sayxunoboddagi stadionga haydab tushgan va atrofdagilar hayotiga xavf solgan. U mashinani odamlar ustiga yo‘naltirgan va natijada ikki kishiga zarar yetkazgan. Voqea joyidan qochib ketgan haydovchi keyinchalik qo‘lga olinib, unga nisbatan Jinoyat kodeksining 277-moddasi (bezorilik) bo‘yicha ish ochilgan.

 

Sud qaroriga ko‘ra, haydovchiga 4 yil 6 oy ozodlikdan mahrum etish jazosi tayinlandi. Jinoyatda ishlatilgan avtomobil esa davlat foydasiga musodara qilinib, byuroning Sayxunobod tuman bo‘limi tomonidan auksion savdosiga chiqarildi.

 

2025-yil 3-mart kuni bo‘lib o‘tgan savdoda Captiva 100 million 567 ming so‘mga sotildi va mablag‘ davlat g‘aznasiga yo‘naltirildi.

 

Ayblanuvchi sud jarayonida o‘z xatti-harakatidan afsuslanishini bildirib, shunday degan: "Ikkinchi aylangan vaqtimda mashinamning burchagi bir bolaga tegib ketdi. Keyin shuncha voqea bo‘ldi, tavakkal dedim-da, stadion darvozasiga qarab haydadim. O‘sha orada mashinani toshbo‘ron qilishdi. Keyin to‘g‘ri chiqib, uyimga ketdim. Hammadan uzr so‘rayman, tavba qildim. Endi umuman odam yig‘ilgan joyga, to‘yga ham bormayman, va’da beraman. Oxirgi imkoniyat berishingizni so‘rayman."

 

Sud jarayonida jabrlanuvchilar haydovchiga e’tirozi yo‘qligini bildirgan bo‘lsa-da, uning voqea joyidan qochib ketgani og‘irlashtiruvchi holat sifatida baholangan va unga ozodlikdan mahrum etish jazosi tayinlangan.