Qashqadaryoda Nexia haydovchisi uch nafar inspektorni urib ketdi
Oqibatda ikki nafar profilaktika inspektori halok bo‘ldi.
Qashqadaryo viloyatining Muborak tumanida yuz bergan yo‘l-transport hodisasi ikki nafar ichki ishlar xodimining umriga zomin bo‘ldi. Dastlabki ma’lumotlarga ko‘ra, Nexia avtomobilini boshqargan haydovchi rulda uxlab qolgan va yo‘lda xizmat olib borayotgan uch nafar profilaktika inspektorini urib ketgan.
Fojia oqibatida ulardan biri voqea joyida, yana biri esa shifoxonada vafot etgan. Uchinchi inspektor esa hozirda shifoxonada davolanmoqda.
Bosh prokuratura matbuot kotibi Hayot Shamsutdinovning ma’lum qilishicha, hodisa yuzasidan Jinoyat kodeksining 266-moddasi 3-qismi “a” bandi (odam o‘limiga sabab bo‘lgan YTH) bilan jinoyat ishi qo‘zg‘atilgan. Sud qaroriga binoan haydovchiga nisbatan qamoq ehtiyot chorasi qo‘llangan.
